أخر المستجدات
الرئيسية » أدب الكتاب » الشاعرة المصرية اميمة فراج – روح الوطن
الشاعرة المصرية اميمة فراج – روح الوطن

الشاعرة المصرية اميمة فراج – روح الوطن

مقتطفات من كلمات الشاعرة المصرية أميمة فراج
……………………….
روح الوطن
طاالعة تخبط ع البيوت
وتبص في عيون البشر
وتمد عينها في البدن
وتفتش الليل والسكوت
يمكن تلاقي وسطهم فارس عنيد
يقبلها بسنينها العجاف
يزرع سنابل عشقها في كل القلوب
حتي اللي خاف
ويوزع الرزق الحلال علي كل ايد
روح الوطن
طااالعة تفتش جوة قلب العاشقين
يمكن تلاقي فوسطهم يوسف جدييد
………………….
انا واحد من الملايين
يقوموا الصبح من نومهم
يلاقوا نفسهم عايشين
يخشوا جوة دوامة رغيف العيش
نلاقي قوتنا لو مرة ومرة مافيش
لا لينا في ثورة مسروقة
ولا في بناية محروقة
ولا خراطيش
لا عمري هتفت للخاين
ولا حبيت اكون باين
ولا معدود علي الدولة
ولا قولت اني يوم أولي
رضيت بقليلي لو حتي النهار مايجيش
………………
وحشتيني يا ست الحسن يا ضحكة ما فرحتشي
وحشتيني يا اجمل بنت في الحلوين ما حلمتشي
يا نجماية في سما الاحزان
يا ورداية في قلب جنينة الاحزان ما دبلتشي
وحشتني ولو مرت سنين وسنين
هتفضل صورتك الغالية في عيني حلم ما كملشي
……………………….
قفلت بابي وقولت نامي وغمضي
افكاري نطت قولت يا ستي اهمدي
وكفاية انك لاقية هدمة تسترك
ولقمة سادة جوع بينهش معدتك
مالك بقي مين اللي باع واللي اشتري
مين اللي ضاع مين اللي ع الخلق افتري
خليكي بس انتي في حالك واسكتي
والله يعينها ع اللي كان واللي جري
……………………..
ولولا الصبر موروثنا
ولولا كتير في ليل دوسنا
وطبطبنا علي الاوجاع
ووطينا لريح روسنا
لا كنت بقيت ولا كنا
ولا عاش الوطن بينا
ولا حلم الغلابة ضاع

عن د.جهاد ابومحفوظ

إلى الأعلى